संसद सचिवालयको एक उच्चस्तरीय टोली दस दिने भ्रमणका क्रममा आज क्यानडा जाँदैछ। संविधानसभाका अध्यक्ष सुवास नेम्वाङको नेतृत्वमा जान लागेको टोलीमा एमाले सभासद् अग्नि खरेल, एकीकृत माओवादीका पम्फा भूषाल र एकराज भण्डारी, मधेशी जनअधिकार फोरम लोकतान्त्रिकका रामजनम चौधरी र संसद सचिवालयका महासचिव मनोहरप्रसाद भट्टराइ र संसद सचिवालयका कानुनी सल्लाहकार टेक प्रसाद ढुंगाना रहेका छन्। टोलीमा नेपाल बार एशोसिएसनका पदाधिकारी पनि रहने छन्। क्यानडा सरकार र क्यानडा बार एशोसिएशनको संयुक्त निमन्त्रणामा जान लागेको टोलीले त्यहाँ रहँदा संघीय न्याय प्रणालीका विषयमा अध्ययन गर्ने बताइएको छ। दस दिने लामो भ्रमण भए पनि सभाध्यक्ष नेम्वाङ र महासचिव भट्टराई कात्तिक आठ गते नै स्वदेस फर्कनु हुने छ भने टोलीका अन्य सदस्य भने कात्तिक एघार गते मात्र फर्कने कार्यक्रम रहेको नेम्वाङका निजी सचिव सुदर्शन कुइकेलले जानकारी दिनुभयो।
