११ औं चरणको प्रधानमन्त्रीय निर्वाचन पनि व्यर्थ, अर्को निर्वाचन असोज २४ गते

११ पटकको प्रधानमन्त्री निर्वाचनबाट पनि असफलता हात लागेपछि ब्यवस्थापिका संसदमा दशैंअघि अब एकपटक मात्र चुनाव हुने भएको छ । कार्यब्यवस्था परामर्श समितिको आजको बैठकले १२ औं चरणको चुनाव आगामी २४ गते र १३ औं चुनाव भने कात्तिक ९ गते गर्ने निर्णय गरेको हो । दिनहुंजसो भैरहेको निर्वाचनबाट परिणाम निस्कन नसकेपछि निरर्थक चुनावी श्रृंखलाले दशैंभरका लागि विश्राम पाएको छ । ब्यवस्थापिका संसदमा आज भएको मतदानमा पनि एक्ला उम्मेद्वार रामचन्द्र पौडेले बहुमत पाउन सक्नुभएन । पौडेललाई प्रधानमन्त्रीमा चयन गरियोस भन्ने प्रस्ताव ११ औ्र पटक असफल भएको हो । पौडेलको समर्थनमा १ सय ४ मतमात्र परेको थियो । मतदान प्रकि्रयामा सहभागि १ सय ४५ सभासदमध्ये ४० जना तटस्थ बसे । प्रधानमन्त्रीको एक्लो दौडमा कांग्रेसका उम्मेदवार पौडेल मात्रै हुनुहुन्छ । माओवादी एमाले मधेशवादी र साना दल भने आज पनि तटस्थ बसे । संसदको आजको बैठकले राष्ट्रिय सभाका तात्कालीन सांसद नरबहादुर गुरुङको निधनमा शोक प्रस्ताव पारित गरेको छ । २ हजार ४६ सालको राष्ट्रिय सभामा नेपाली काँग्रेसका तर्फबाट सदस्य बन्नुभएका गुरुङको ६९ वर्षको उमेरमा गत मंगलबार निधन भएको थियो ।